रामाश्रय

 राजाभाऊ आज फोर कोर्स डिनरला गेले.

रसम विथ भात, सांबार विथ भात, डाळ विथ भात, आणि दही विथ भात.

माटुंग्याच्या "रामाश्रय" ने समोरच आपली दुसरी शाखा उघडल्याचे राजाभाऊंच्या कानावर आले, मग काय त्यांच्याने रहावते काय ? धीर काय धरवतो काय ? 

रामाश्रय मधे दाक्षिणात्य थाळी खायला आज राजाभाऊ पोचले.

भाज्या अगम्य होत्या तो भाग वेगळा, एकही भाजी कसली होती नाही कळले. अर्थात ह्याची राजाभाऊंना कल्पना होतीच. जेवण तसे आवडले, रसम उत्तम होते. गरमागरम दोन वाट्या प्याल्यावर पोटात अग्नी पेटला होता.

पण,

पण रामा नायक यांचे श्रीकृष्ण बोर्डींग हाऊसच्या जेवणाच्या हे जवळपास फिरकत नाही असे राजाभाऊंचे वैयक्तीक मत झाले.

काळेकाकुंनी मसाला डोसा मागवला तो फार चवदार होता. 

"रामाश्रय" हे बहुदा नुकतेच उघडले असेल. जागा फार प्रशस्त आहे, छान आहे. जुन्या रामाश्रयपेक्षा येथे प्रसन्न वाटते.

ह्या जागी पुर्वी "सरस्वती" नावाचे उपहारगृह होते, ते बंद पडुन खुप वर्षे झाली होती. 

आता राजाभाऊंची द्विधा मनस्थिती झाली आहे. डोसे खाण्यासाठी जुन्या जागी जायचे की नव्या ? जुने सोडवत नाही आणि नविन धरवत नाही अशी अवस्था झाली आहे.